ଖମାର ବିଦ୍ୟୁତ୍ କାର୍ଯ୍ୟାଳୟର ଅନ୍ଧାରି ସେବା
ଖମାର(ଜୟ ଓଡିଶା) - ଓଡ଼ିଆରେ ଗୋଟେ ପ୍ରବାଦ ରହିଛି, ବଢେଇ ଘରେ ତାଟି କବାଟ ଅର୍ଥାତ୍ ଅନ୍ୟମାନଙ୍କ ଘରକୁ ସୁନ୍ଦର ଏବଂ ସୁରକ୍ଷିତ ରଖିବା ପାଇଁ ବଢେଇ ସୁନ୍ଦର ଏବଂ ମଜଭୁତ କବାଟ ତିଆରି କରିଥାଏ କିନ୍ତୁ ଦୁଃଖର ବିଷୟ ଅନ୍ୟ ଘର କଥା ଚିନ୍ତା କରୁଥିବା ବଢେଇ ର ଘରେ ତାଟି କବାଟ ଦ୍ବାରା ନିଜ ଘରକୁ ସୁରକ୍ଷା ଦେଇଥାଏ। ଏହିଭଳି ଏକ ଘଟଣା ଦେଖିବାକୁ ମିଳିଛି ପାଲ ଲହଡ଼ା ସବ ଡିଭିଜନ ଅନ୍ତର୍ଗତ ଖମାର ଠାରେ ଅବସ୍ଥିତ ବିଦ୍ୟୁତ୍ ସବ ଷ୍ଟେସନ କାର୍ଯ୍ୟାଳୟ ଠାରେ । ବିଦ୍ୟୁତ୍ ଯୋଗାଣ ଓ ପାରିପାର୍ଶିକ ପରିବେଶ ଅତ୍ୟନ୍ତ ଶୋଚନୀୟ ହୋଇ ପଡ଼ିଛି । ଟାଟା ପାୱାର ସୁରକ୍ଷା କୁ ସର୍ବାଧିକ ପ୍ରାଥମିକତା ଦେଉଥିବା ବେଳେ, ଖମାର ପ୍ରାଥମିକ ସବ ଷ୍ଟେସନ ଓ କାର୍ଯ୍ୟାଳୟ ରେ ଗୋଟିଏ ଲାଇଟ୍ ନଥିବାରୁ ରାତି ହେଲେ ସେବା ଯୋଗାଇବା ପାଇଁ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି କର୍ମଚାରୀ । ରାତ୍ରୀ ସମୟରେ କୌଣସି ଫିଡର ର ରକ୍ଷଣା ବେକ୍ଷଣ ହେଉ ଅବା ଟ୍ରିପ ହେଲେ ତାହାକୁ ପୁନଃ କାର୍ଯ୍ୟକ୍ଷମ କରିବାକୁ ମୋବାଇଲ ଟର୍ଚ୍ଚ ର ସାହଯ୍ୟ ନେବାକୁ ପଡ଼ିଥାଏ , ଫଳରେ ୧୦ ମିନିଟ୍ ର କାମ ପାଈଁ ଘଣ୍ଟା ଘଣ୍ଟା ବିଦ୍ୟୁତ୍ ଯୋଗାଣ ବନ୍ଦ ରହିଥାଏ । ଏହାଦ୍ବାରା ଉପଭୋକ୍ତା ମାନେ ବିନା କାରଣରେ ହଇରାଣ ହେବା ସହିତ ଏଠାରେ କାର୍ଯ୍ୟ କରୁଥିବା କର୍ମଚାରୀ ମାନେ ଆଞ୍ଚଳିକ ଲୋକ ମାନଙ୍କ ଆକ୍ରୋଶର ଶିକାର ହୁଅନ୍ତି । ଫିଡର ରକ୍ଷଣା ବେକ୍ଷଣ ପାଈଁ ଦିଆଯାଉଥିବା ସଟ ଡାଉନ୍ ଠିକ ଭାବେ ହେଇଛି ନା ନାହିଁ ତାହା ଦେଖିବା କଷ୍ଟକର ହୋଈ ପଡେ, ଫଳରେ ଏହା ଦ୍ବାରା ଦୁର୍ଘଟଣା ର ସମ୍ଭାବନା କୁ ଏଡାଇ ଦିଆ ଯାଇନପାରେ । ବିଦ୍ୟୁତ୍ କାର୍ଯ୍ୟ ରେ ନିୟୋଜିତ କର୍ମଚାରୀ ମାନଙ୍କ ଉପରେ ପ୍ରତ୍ୟେକ ମୁହୂର୍ତ୍ତରେ ବିପଦ ରହିଥିବା ବେଳେ, ମୁଳ ଜାଗା ଅର୍ଥାତ୍ ପି ଏସ ଏସ ( ପ୍ରାରମ୍ଭିକ ସବ୍ ଷ୍ଟେସନ)କୁ ଯେଭଳି ଭାବେ ଅବହେଳିତ କରି ରଖା ଯାଇଛି, ସେଥିରୁ ସ୍ପଷ୍ଟ ଭାବରେ ଅନୁମାନ କରିହେବ ଯେ ଗ୍ରାମାଞ୍ଚଳ ରେ ଟାଟା ପାୱାରର ସୁରକ୍ଷା କେମିତି ଥିବ ? କନିଷ୍ଠ ଯନ୍ତ୍ରୀଙ୍କ ସୂଚନା ଅନୁଯାୟୀ ଏହି ସବ ଷ୍ଟେସନ ରେ ତିନୋଟି ଲାଇଟ୍ ଥିଲା କିନ୍ତୁ ଦୀର୍ଘ ଦୁଇ ବର୍ଷ ହେବ ଏହା ଖରାପ ହେଇ ଯାଇଛି, ଏ ସଂକ୍ରାନ୍ତରେ ଉପରିସ୍ଥ ଅଧିକାରୀଙ୍କୁ ଅବଗତ କରାଯାଇଛି, ମେଲ ଦିଆଯାଇଛି ଏବଂ ଚିଠି କରାଯାଇଛି କିନ୍ତୁ କୌଣସି ସଫଳତା ମିଳି ନାହିଁ । ତେବେ କର୍ମଚାରୀଙ୍କ କହିବା ଅନୁଯାୟୀ ଟାଟା ପାୱାର ସୁରକ୍ଷା ବିଜ୍ଞାପନ କେବଳ ଏକ ପ୍ରହସନ ମାତ୍ର । ଏଠି ଠିକା ଶ୍ରମିକଙ୍କ ପାଇଁ ସବୁ ଏକ ପହସନ୍ ମାତ୍ର । ପ୍ରାରମ୍ଭିକ ସବ ଷ୍ଟେସନ ଲାଇଟ୍ ର ସମସ୍ୟା ସହିତ ଅନେକ ଅସୁବିଧା ରହିଛି ଯାହାକୁ ବାରମ୍ବାର ଅଭିଯୋଗ ପରେ ମଧ୍ଯ ସମାଧାନ ନହେବା ପରିତାପର ବିଷୟ ବୋଲି କହିଛନ୍ତି କର୍ମଚାରୀ ।
