ଲଗାଣ ବର୍ଷାରେ ଘର ଉପରେ ପଡ଼ିଲା ଗଛ, ଅଳ୍ପକେ ବର୍ତ୍ତିଲା ପରିବାର
କଲମପୁର( ଜୟ ଓଡିଶା) : ମୁଖିଗୁଡା: ଗତ ଚାରିଦିନ ଧରି ଲାଗି ରହିଛି ବର୍ଷା। ଏହି ଲଗାଣ ବର୍ଷା ଯୋଗୁଁଁ ଗୁରୁବାର ସକାଳେ ଲାଞ୍ଜିଗଡ଼ ନିର୍ବାଚନ ମଣ୍ଡଳୀ ଅଧିନସ୍ଥ ଜୟପାଟଣା ବ୍ଲକ ଆଟିଗାଁଠାରେ ଘଟିଛି ଏକ ଅଘଟଣ। ଏକ ବିରାଟକାୟ ଗଛ ଉପୁଡି ପଡ଼ି ଜନୈକ ବ୍ୟକ୍ତିଙ୍କ ଘର ଉପରେ ପଡ଼ିଯିବା ଯୋଗୁଁଁ ଘର ଭାଙ୍ଗି ଯାଇଛି। କିନ୍ତୁ ସୌଭାଗ୍ୟବସତଃ ଘର ଭିତରେ ଥିବା ପରିବାର ଲୋକ ଅଳ୍ପକେ ଏକ ବଡ ବିପଦରୁ ବର୍ତି ଯାଇଛନ୍ତି। ସୂଚନା ଅନୁସାରେ, ସକାଳେ ହଠାତ୍ ଆଟିଗାଁର ତରୁଲତା ମାଝୀ ନାମକ ଜନୈକ ମହିଳାଙ୍କ ଘର ସମ୍ମୁଖରେ ଥିବା ଏକ ବିରାଟକାୟ ଗଛ ଉପୁଡି ପଡ଼ିଥିଲା। ଗଛଟି ତରୁଲତାଙ୍କ ଘର ଉପରେ ପଡ଼ିଯିବାରୁ ଘର ଭାଙ୍ଗିବାସହ ଘରର ଆସବାବପତ୍ର ନଷ୍ଟ ହୋଇଛି। ଏପରିକି ଘରେ ସାଇତି ରଖିଥିବା ଧାନ, ଚାଉଳ, ସମେତ ଅନ୍ୟ ଘରର ଅତି ଆବଶ୍ୟକ ଆସବାବପତ୍ର ନଷ୍ଟ ହୋଇଛି। ଏନେଇ ଜୟପାଟଣା ଅଗ୍ନିଶମ ବିଭାଗକୁ ସୂଚନା ଦେବାପରେ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ଘର ଉପରେ ପଡ଼ିଥିବା ଗଛ କାଟି ସଫା କରିଥିଲେ। ବର୍ତମାନ ବର୍ଷା ଋତୁ। ଏଭଳି ସ୍ଥିତିରେ ଗଛ ପଡ଼ି ଘର ଭାଙ୍ଗିଯିବାରୁ ଘର ମରାମତି ଅଥବା ନୂତନ ଘର ନିର୍ମାଣ କରିବା ସମ୍ଭବ ନୁହେଁ। ଏଭଳି ସ୍ଥିତିରେ ପରିବାର ଲୋକ ଆଶ୍ରୟ ନେବେ କେଉଁଠି ସେନେଇ ଚିନ୍ତିତ ହେଇ ପଡ଼ିଛନ୍ତି।ଅନ୍ୟପଟେ ସରକାରଙ୍କ ପକ୍ଷରୁ ତୁରନ୍ତ ଏଭଳି ଅସହାୟ ପରିବାରକୁ ସହାୟତା ଯୋଗାଇ ଦେବାକୁ ଗ୍ରାମବାସୀ ଅନୁରୋଧ କରିଛନ୍ତି। ଏନେଇ ଜୟପାଟଣା ତହସିଲଦାର ରଘୁନାଥ ମୁଣ୍ଡାରୀଙ୍କ ସହ ଯୋଗାଯୋଗ ପାଇଁ ପ୍ରୟାସ କରା ଯାଇଥିଲା କିନ୍ତୁ ସେ ଫୋନ ଉଠାଇ ନ ଥିବାରୁ କୌଣସି ମତାମତ ନିଆଯାଇ ପାରିନାହିଁ।
